Social Media Era: Blessing Bhi, Curse Bhi

India ek aisa desh hai jahan population crores mein hai. Isi population ki wajah se yahan opportunities bhi bohot zyada hain aur competition bhi utna hi tough. Aaj ke digital era mein YouTube channels, Instagram reels aur YouTube Shorts India mein bahut jaldi hit hote hain, kyunki audience ki kami nahi hai. Har type ke content ke liye yahan dekhne wale mil hi jaate hain. Ye population hamari strength bhi hai aur weakness bhi.

Agar hum is population ke positive side ki baat karein, to yahan har insaan ko apni baat rakhne ka mauka milta hai. Aaj har dusra banda apni kahani, apna struggle, apni journey social media par share kar raha hai. Koi apni success story bata raha hai, koi failure se seekh. Aur sach yeh hai ki kahin na kahin, koi na koi insaan us content se relate zaroor karta hai. Isi wajah se social media platforms India mein itne powerful ban chuke hain.

Lekin jahan fayda hota hai, wahan nuksaan bhi hota hai. India mein bheed har jagah hai — chahe government exams ho jaise UPSC, UGC, NET, SSC ya phir private jobs, business aur ab content creation. Har profession mein log hi log hain. Social media bhi ab ek bheed ban chuka hai, jahan har koi creator banna chahta hai, par har koi value create nahi kar paata.

Jo log genuinely mehnat kar rahe hain, jo funny, entertaining ya knowledge-based content bana rahe hain, wo appreciation ke haqdar hain. Unka content society ko kuch na kuch positive deta hai. Lekin iske saath hi ek dark side bhi hai jise ignore nahi kiya jaa sakta. Likes aur views ke chakkar mein bohot se log vulgarity tak pahunch jaate hain. Cheap content, unnecessary boldness aur limits cross karna aaj common hota jaa raha hai.

Iska result hum apne aas-paas dekh rahe hain. Mandiron mein phones ban ho rahe hain, kyunki log bhagwan ke darshan se zyada reel banane mein busy ho jaate hain. Log apne life ke moments ko jeene ke bajay record karne lage hain. Enjoy kam aur show-off zyada ho gaya hai. Social media ne life ko document kar diya hai, feel karna kahin peeche chhoot gaya hai.

Ye kehna galat hoga ki social media sirf bura hai. Sach to yeh hai ki social media blessing bhi hai aur curse bhi. Ye kisi ko career de sakta hai, kisi ko awaaz, kisi ko pehchaan. Par jab iski limit cross hoti hai, tab values khatam hone lagti hain aur society par iska negative impact padta hai.

Social media ka ek aur bada nuksaan yeh bhi hai ki humein aksar wahi information milti rehti hai jo humein chahiye hi nahi hoti. Har waqt entertainment world se judi news, celebrity gossip, ya phir aisi baatein jo na to hamari personal life se related hoti hain aur na hi hamare growth mein koi role play karti hain. Itni zyada information aa jaati hai ki kabhi-kabhi lagta hai jaise dimag overload ho gaya ho. Had se zyada befaltu aur irrelevant news ko baar-baar dikhaya jaata hai, jahan choti si baat ko bada chadha kar represent kiya jaata hai.

Iska sabse disturbing aspect yeh hai ki aaj actors aur politicians ke beech ka farq bhi dheere-dheere blur hota jaa raha hai. Jab bhi kisi actor ki movie ya web series release hoti hai, ya phir elections ka time aata hai, social media ko had se zyada apne fayde ke liye exploit kiya jaata hai. Har jagah promotion, narratives aur trends forcefully push kiye jaate hain, jisse common log confuse ho jaate hain ki real kya hai aur staged kya. Yeh manipulation social media ki sabse worst side ko dikhata hai.

Is poori baat ka moral bilkul simple hai. Har cheez limit mein hi achi lagti hai. Chahe wo social media ho, information ho, entertainment ho, fame ho ya attention. Jab limit cross hoti hai, to wahi cheez jo pehle useful lagti thi, dheere-dheere harmful ban jaati hai. Balance hi life ka aur social media ka sabse bada truth hai.