Written by 4:10 pm Stories​ • 3 Comments Views: 27

Life and Moments

Zindagi Ka Ek Pal – The Story of Katyayni’s Struggles and Faith

Din kaafi acha guzra tha. Katyayni bahar ghoomne gayi thi, apne liye teen naye tops kharide. Uske baad Lakshmi-Narayan mandir bhi gayi, aur us din Ganesh Chaturthi thi. Usne modak kharide Ganpati ko chadhane ke liye, aur do mala (Gralands)Lakshmi-Narayan ji ko chadhayi. Mandir me shanti se matha teka, fir ghar aayi. Khushi khushi apne naye kapde gharwalo ko dikhaye, prashad banta, aur sab normal lag raha tha.

Raat ke lagbhag 12:30 baje Katyayni ne apna room band kiya aur sone ja rahi thi, tabhi mummy ne door knock kiya:
“Gaadi ki chabi dena.”

Usne poocha: “Kyun?”
Mummy boli: “Nana ki tabiyat theek nahi hai, hospital le kar jana hai.”

Chabi dete hue Katyayni ne poocha, “Mummy, aap bhi ja rahi ho kya?”
Mummy ne kaha, “Haan.”

Wo gusse aur frustration mein boli, “Aapka jana zaruri hai kya?”
Mummy ne calmly jawab diya, “Haan, main jaungi.”

Usne poocha, “Main chalun?”
Mummy boli, “Dekh lo, agar tumhe thik lage.”

Waise toh uska bilkul mann nahi tha, par Katyayni ko government hospital ke halat ka andaza tha. Apni mummy ko itni raat ko yeh sab dekhne dena usse bardaasht nahi tha. Wo bhi chali gayi.

Gaadi mein mama ne already drink ki hui thi. Back seat par Nana baithe the. Mama ne mummy se kaha:
“Didi baitho.”

Katyayni gusse mein boli, “Mummy kya karengi? Main hoon, chalo.”

Mama ne bina kuch kahe gaadi start ki. Lekin uska gussa aur bhi badhta gaya. Pehla gussa – mama ko khud problem thi ke Nana apna treatment gaon se karwane aaye hain, aur drink band karne ko tayyar nahi. Dusra gussa – woh gaadi jo family ne second hand kharidi thi, uski khushi mama ko kabhi nahi thi, lekin aaj woh hi gaadi drive kar rahe the. Teesra gussa – Rakhi wale din mama ghar nahi aaye the, lekin problem ho toh turant aa jate hain.

Katyayni ki problem ek hi thi: aisi harkate uski mummy ko hurt karti thi, jo usse bilkul pasand nahi tha.

Hospital pahunchte hi samne ek accident case tha. Ambulance se lahu-luhan log andar laaye ja rahe the. Usne socha – government hospital aana kisi narak se kam nahi, ek “semi-narak” jaisa hai, kyunki yaha se log kabhi theek hokar aate hain, kabhi nahi. Nana ko glucose lagaya gaya aur thodi der baad wapas ghar laut gaye.

Raste mein Katyayni ne mama se do baar kaha: “Main gaadi chala leti hoon.”
Mama ne casually kaha: “Din mein chala lena.”

Ye sunkar uska gussa aur badh gaya. Wapas aate hue wo sirf chup chaap baithi rahi, mann mein bas frustration bhar gaya tha.

Jaise hi ghar aayi, Katyayni ne apni behen ko phone kiya:
“Mere se nahi ho raha ye sab drama. Main relatives ki faltu problems nahi dekh sakti.”

Behen bhi dukh mein thi. Usne suggest kiya:
“Tu bhi bhai ki tarah bahar job dekh le. Kam se kam aise dramas se door rahegi.”

Katyayni ne kaha: “Theek hai… par abhi mera mann kar raha hai suicide karne ka. Mujhse nahi ho raha is dogli duniya mein.”

Ye kehkar phone cut kiya aur rote rote so gayi.

Agle din sab waisa hi normal tha, jaise raat ko kuch hua hi na ho. Uski ek aadat thi diary likhne ki. Usne apni diary mein likha:

“Life ajeeb hai, bahut ajeeb. Jab socho sab acha hoga, tabhi kuch bakwas ho jata hai. Jab socho paise bachane hain, paise kharch ho jate hain. Jab socho bimar na hona, tabhi bimari aa jati hai. In simple words – life is unpredictable, actually super unpredictable. Lekin marne ke bare mein sochne se acha hai, ro lo ya so jao.”

Visited 27 times, 1 visit(s) today
Close