Life ek Kurukshetra hai. Dwapar Yug me yeh yudh maidan me hua tha, lekin Kalyug me yeh yudh har ghar, har dil, aur har roz ke karmo me chalta hai. Ab yudh talwaron se nahi, balki emotion aur dhairya se lada ja raha hai.

Har roz jab hum apne karm nibhaane jaate hain — chahe office ho, ghar ho ya rishton ka maidan — aisa lagta hai jaise hum apne hi Kurukshetra ke yodha hain.
Yahan khoon ki nadiyan nahi, par mann aur dil ke sangharsh kisi ghayal yodha se kam nahi.

💫 Dhan, Shakti Aur Shanti Ka Sach

Jaise Duryodhan ne Shree Krishna ji ki sena maangi thi aur Arjun ne Krishna ka saath,
waise hi aaj ke yug me bhi do raaste hain —
Ek raasta dhan aur daulat ka,
aur doosra raasta Bhakti aur Bhagwan ke saath ka.

Ameer ke paas sab kuch hota hai, par mann ki shanti aur sukoon ki neend nahi.
Bhagwan jisko vastu-sampatti dete hain, usko usi me uljha dete hain;
par jisko apna saath dete hain, usse kabhi akela nahi chodte.
Unke paas kuch na hokar bhi sab kuch hota hai.

🌼 Bhakti Hi Hai Asli Shakti

Bhakti ek ehsaas hai — dil se dil tak pahuchne wala.
Jab hum Bhagwan ka shukar karte hain, tab Bhagwan humse door nahi rehte.
Wo humare har dukh, har sukh me saath rehte hain.

Hamare itihaas me yeh sabit hua hai —
Pandav, Sudama, Bhakt Prahlad, Dhruv, Shabri ji — sabne apni zindagi Bhagwan ko samarpit kar di,
aur isi karan unhe sukh, shanti aur moksha mila.

Chahe Dwapar Yug ka Kurukshetra ho ya Kalyug ka sangharsh,
jeet hamesha unhi ki hoti hai jinke saath Bhagwan aur Bhakti hoti hai.